Thaçi: Kosova bëri dy hapa të mëdhenj drejt ardhmërisë së sigurt

0
21

Presidenti i Kosovës, Hashim Thaçi, ka thënë se tashmë Kosova i ka bërë dy hapat më të mëdhenj drejt ardhmërisë së sigurt në paqe e prosperitet.

Thaçi, përmes një postimi në Facebook, tha se njëri hap është themelimi i Ekipit përgatitor që do të përgatisë infrastrukturën teknike e ligjore për Komisionin për të vërtetën dhe pajtimin, e që është hap përmbyllës i kapitullit të luftës. Kurse arritja e marrëveshjes për projektin “Kosova e Re”, sipas Thaçit është hapi tjetër historik që e forcon paqen e prosperitetin e kosovarëve.

“Kosova bëri dy hapa të mëdhenj drejt ardhmërisë së sigurt në paqe e prosperitet këtë javë. Hapi i parë ishte themelimi i Ekipit Përgatitor që do të përgatisë infrastrukturën teknike e ligjore për Komisionin për të Vërtetën dhe Pajtimin, si hap përmbyllës i kapitullit të luftës. Komisioni për të Vërtetën dhe Pajtimin synon që duke promovuar dialogun në mes të gjitha komuniteteve në Kosovë të arrijë pajtimin për dhimbjet e shkaktuara nga lufta dhe pajtimin që të mos përsëriten më kurrë ato vuajtje dhe shkatërrime”, ka shkruar Thaçi.

“Hapi i dytë ishte arritja e marrëveshjes për projektin ‘Kosova e Re’, që do të nënshkruhet nga palët më 20 dhjetor. Është ky investimi më i madh privat në historinë e Kosovës, prej rreth 1.3 miliardë euro, që do të krijojë 10.000 vende të reja të punës. Mbi të gjitha do të sigurojë pavarësinë energjetike të Kosovës dhe garantojë investimet e tjera në prodhim dhe ekonomi në përgjithësi”, ka shkruar presidneti.

“Janë hapa historikë që do të forcojnë paqen dhe prosperitetin për të gjithë qytetarët e Kosovës, duke kontribuar kështu edhe për paqen dhe stabilitetin në rajon e më gjerë. Kur kujtojmë se ku ishim dy dekada më herët, nuk mund të mos mburremi me të arriturat e popullit tonë dhe me përkushtimin për një shtet shembullor”, ka shkruar Thaçi.

PËRGJIGJU

Please enter your comment!
Please enter your name here